ინგლისურის ენის შესწავლა ბევრი ადამიანის პრიორიტეტია, მაგრამ ხშირად დროის, ენერგიისა და ფინანსების ნაკლებობა ხელს უშლის მათ მიზნის მიღწევაში. საბედნიეროდ, ტექნოლოგიის განვითარებამ სწავლის პროცესი გაამარტივა და უფრო ხელმისაწვდომი გახადა. ერთ-ერთი ასეთი საშუალება გახლავთ ენის შემსწავლელი აპლიკაციები. ამ ბლოგში განვიხილავთ 7 საუკეთესო აპლიკაციას, რომლებიც ყველას შეუძლია გამოიყენოს ინგლისური ენის შესასწავლად.
ყოველი აპლიკაცია გამოირჩევა თავისი უნიკალური მიდგომით. ზოგი მათგანი მთლიანად ინტერაქციულია, ზოგი კი მხოლოდ გამოთქმაზეა ორიენტირებული. აპების ნაწილი ფასიანია, თუმცა ზოგიერთი მათგანი უფასო ვერსიასაც გვთავაზობს.
აპლიკაციები, რომლებსაც ამ ბლოგში ნახავ
1. Duolingo
დუოლინგო ერთ-ერთი ყველაზე პოპულარული და ფართოდ გამოყენებადი ენის შემსწავლელი აპლიკაციაა. აპი უფასოა და მისი მეშვეობით შეგიძლია ისწავლო სხვადასხვა უცხო ენა, მათ შორის ინგლისური, ან გაიმყარო უკვე არსებული ცოდნა. თუმცა, თუ გსურს დამატებითი პრივილეგიებით სარგებლობა, როგორიცაა შეუზღუდავი რაოდენობის “გულები” (ეს იგივეა, რაც სიცოცხლე ვიდეო თამაშებში), ამ შემთხვევაში დაგჭირდება გარკვეული საფასურის სანაცვლოდ სუპერ დუოლინგოს პაკეტზე გადახვიდე.
დუოლინგოს უნიკალურობა სწავლის პროცესისა და თამაშის იდეის შერწყმაში მდგომარეობს – მომხმარებელს კითხვის, წერის, საუბრისა და მოსმენის უნარების განვითარება სახალისო მეთოდით შეუძლია.
აპლიკაციის ერთ-ერთი ყველაზე გამორჩეული მახასიათებელი მისი უნიკალური ბრენდინგია. დუოლინგოს ჰყავს საკუთარი მასკოტი – ბუ დუო, რომელიც თავისი პასიურ-აგრესიული შეტყობინებებით ცდილობს მომხმარებელი მუდმივად ჩართული იყოს სწავლის პროცესში და არ დაკარგოს მოტივაცია.
- აპლიკაცია იმდენად მარტივია გამოსაყენებლად, რომ ნებისმიერი ასაკის ადამიანს შეუძლია მასთან დამეგობრება.
- თამაშის ელემენტები, როგორიცაა დონეების გადალახვა და ჯილდოები სწავლის პროცესს სახალისოსა და საინტერესოს ხდის.
- უფასო ვერსია მრავალფეროვან შესაძლებლობებს გთავაზობს და აუცილებელი არაა, ფული გადაიხადო დამატებითი ფუნქციებისთვის.
- დუოლინგო დაგეხმარება, გაავარჯიშო ყველა საჭირო უნარი: კითხვა, წერა, საუბარი და მოსმენა.
- ექსცენტრიკული მასკოტი დუო თავისი შარმით და აქტიურობით ყოველთვის შეგახსენებს, რომ ენის შესწავლა სახალისო და სასიამოვნო პროცესია.
- თუ ენის ღრმა და საფუძვლიანი შესწავლა გსურს, დოულინგოს მასალა შეუიძლება შენთვის ზედმეტად მარტივი იყოს.
- აპლიკაციას არ აქვს ქართული ენის მხარდაჭერა, ამიტომ ინგლისურის სწავლა სხვა ენაზე მოგიწევს.
- თუ უფასო ვერსიით სარგებლობ, მოემზადე მომაბეზრებელი რეკლამებისთვის.
- არასაკმარისი პრაქტიკა: დუოლინგოს სავარჯიშოები შეიძლება საკმარისი არ იყოს, რომ რეალურ ცხოვრებაში საუბარი თავდაჯერებულად წარმართო.
- გარკვეული დროის შემდეგ, დიდი შანსია, დეჟავუს განცდა გაგიჩნდეს და მოგეჩვენოს, რომ ერთსა და იმავე დავალებას ასრულებ.
თუ ინგლისური ენის შესწავლის სახალისო და ადვილ გზას ეძებ, დუოლინგო სწორედ შენთვისაა. აპლიკაციამ შეიძლება ვერ მოგცეს ღრმა ცოდნა, მაგრამ იდეალური ვარიანტია, თუ ახლა იწყებ უცხო ენის დაუფლებას. ამ აპლიკაციასთან ერთად ენის შესწავლა ისეთივე სახალისოა, როგორც ვიდეო თამაში, ოღონდ გაცილებით უფრო სასარგებლო.
რეკომენდებულია შემდეგი დონეებისთვის: A1, A2, B1
2. FluentU
FluentU ენის შესწავლის აპლიკაციაა, რომელიც რეალური სამყაროს ვიდეოებს იყენებს სრულიად ახლებური და ჩამთრევი სასწავლო გამოცდილების შესაქმნელად. ეს ვიდეოები მოიცავს მუსიკალურ კლიპებს, ფილმების ტრეილერებს, ახალ ამბებსა და შთამაგონებელ საუბრებს, რომლებსაც FluentU გარდაქმნის პერსონალიზებულ ენის გაკვეთილებად. სწორედ ეს უნიკალური მიდგომა ხდის FluentU-ს გამორჩეულ პლატფორმად ენის შესწავლის სფეროში.
FluentU-ს ერთ-ერთი მთავარი უპირატესობა ავთენტური კონტენტია. ვიდეოები გეხმარება უკეთ გაიაზრო, როგორ ხდება ენის ბუნებრივად გამოყენება, მათ შორის ჟარგონები, იდიომები და დამატებით, კულტურულ ნიუანსებსაც უკეთ გაეცნობი. ეს ავთენტურობა სწავლის პროცესს უფრო საინტერესოსა და პრაქტიკულს ხდის.
FluentU-ს კიდევ ერთი გამორჩეული მახასიათებელია ინტერაქციულობა. ყოველ ვიდეოს თან ახლავს სუბტიტრები, რომლებიც მომხმარებელს საშუალებას აძლევს, მყისიერად მიიღოს ინფორმაცია ნებისმიერი უცნობი სიტყვის შესახებ – მათ შორის განმარტება, მაგალითები და გამოთქმა. ეს ფუნქცია დაგეხმარება უკეთ გაიგო სიტყვებისა და ფრაზების მნიშვნელობა და გამოყენება რეალურ კონტექსტში.
- FluentU გთავაზობთ ავთენტურ კონტენტს რეალური ცხოვრებიდან.
- ინტერაქციული სუბტიტრები და ქვიზები ძალიან სასარგებლოა ახალი სიტყვებისა და გამოთქმების სასწავლად.
- FluentU სთავაზობს თითოეულ მომხმარებელს პერსონალიზებულ სწავლებას.
- აპლიკაცია იყენებს მრავალფეროვან სწავლების მეთოდებს, რაც სწავლის პროცესს უფრო საინტერესოს ხდის.
- ენის შესწავლის ყველა ასპექტი: მოსმენა, კითხვა, ლაპარაკი, წერა.
- აპლიკაციის ყველა ფუნქციის გამოსაყენებლად აუცილებელია ფასიანი გამოწერა, რომელიც საკმაოდ ძვირი ღირს – $29.99 თვეში, თუმცა ერთლიან გამოწერაზე 40%-იანი ფასდაკლება ვრცელდება.
- FluentU ნაკლებად არის ფოკუსირებული გრამატიკის სისტემატურ სწავლებაზე და საუბრის უნარების განვითარებაზე.
- აპლიკაციის გამოსაყენებლად საჭიროა სტაბილური ინტერნეტ კავშირი.
- ვიდეო მასალის სირთულე შეიძლება გამოწვევა იყოს ენის შესწავლის საწყის ეტაპზე მყოფი მომხმარებლებისთვის.
FluentU გამოირჩევა რეალური ვიდეო კონტენტის გამოყენებით ენის შესასწავლად, რაც აუმჯობესებს ლექსიკას, მოსმენასა და გაგების უნარებს. მისი ინტერაქტიული სუბტიტრები და პერსონალიზებული ქვიზები განსაკუთრებით სასარგებლოა კონტექსტზე დაფუძნებული სწავლის მოყვარულთათვის.
თუმცა, აპლიკაცია ნაკლებად ორიენტირებულია გრამატიკისა და ლაპარაკის უნარების განვითარებაზე და საკმაოდ ძვირია სხვა ალტერნატივებთან შედარებით. მისი გამოყენება განსაკუთრებით ეფექტურია სხვა მეთოდებთან ერთად კომბინაციაში.
რეკომენდებულია შემდეგი დონეებისთვის: B1+, B2, C1
3. Babbel
Babbel ინგლისურის შესწავლას 15-წუთიანი ინტერაქციული გაკვეთილების საშუალებით გთავაზობს. თითოეული გაკვეთილი ფოკუსირებულია თემებზე, რომლებიც შენთვისაა საინტერესოა – ბიზნესიდან დაწყებული, მოგზაურობით დამთავრებული. Babbel-ის ეს უნიკალური მიდგომა ქმნის სასწავლო გამოცდილებას, რომელიც მაქსიმალურად რელევანტურია მოსწავლისთვის.
Babbel-ის გაკვეთილები მოკლე და ლაკონიურია, თუმცა ამავდროულად ძალიან ინფორმაციული და პრაქტიკული. თითოეული გაკვეთილი მოიცავს ლექსიკის წერილობით და აუდიო ვერსიებს, რომლებიც შემდგომ განმტკიცდება სავარჯიშოების შესრულებით.
- Babbel გთავაზობს კარგად სტრუქტურირებულ სასწავლო პროგრამას, რომელიც მოიცავს გრამატიკას, ლექსიკასა და პრაქტიკული საუბრის უნარებს.
- აპლიკაციაში დაგხვდება ინტერაქციული გაკვეთილები დიალოგებით, ვიქტორინებითა და მეტყველების ამოცნობის სავარჯიშოებით, რომლებიც საშუალებას გაძლევს, მარტივად დახვეწო საუბრისა და მოსმენის უნარები.
- ინტერფეისი ინტუიციური და მომხმარებლისთვის მოსახერხებელია, რაც გაკვეთილებში ნავიგაციასა და პროგრესის აღრიცხვას ძალიან გაგიმარტივებს.
- Babbel-ის გაკვეთილებში ინტეგრირებულია კულტურული ჩანართები და კონტექსტი, რაც დაგეხმარება გაიგო სასურველი ენის კულტურული ნიუანსები.
- Babbel ძალიან შეზღუდულ უფასო კონტენტს სთავაზობს მომხმარებელს. რაც შეეხება ფასიან ვერსიას, 6 თვიანი მემბერშიფისთვის თვეში $8.45-ის გადახდა მოგიწევს.
- გაკვეთილები დროთა განმავლობაში შეიძლება განმეორებადი მოგეჩვენოს. მიუხედავად იმისა, რომ გამეორება ხელს უწყობს დამახსოვრებას, ზოგიერთი მომხმარებლისთვის ეს პრაქტიკა მოსაბეზრებელია.
- Babbel იდეალურია დამწყებთათვის, მაგრამ ინგლისურის ენის ცოდნის უფრო მაღალ დონეზე ასაყვანად Babbel დიდად ვერ დაგეხმარება.
Babbel კარგი არჩევანია განსაკუთრებით დამწყებთათვის. აპლიკაცია ეფექტურად ავითარებს საუბრის, მოსმენის, კითხვისა და წერის უნარებს საშუალო დონემდე. ინტერაქციული გაკვეთილები და კულტურული ინსაითები მას ძალიან სასარგებლო ინსტრუმენტად აქცევს, მიუხედავად ღირებულებისა და შეზღუდული უფასო კონტენტისა.
რეკომენდებულია შემდეგი დონეებისთვის: A1, A2, B1, B1+
4. Rosetta Stone
Rosetta Stone ერთ-ერთი ყველაზე ძველი და ცნობილი ენის შემსწავლელი პროგრამაა, რომელმაც შეცვალა ადამიანების მიდგომა ენის სწავლისადმი. ის პირველად გამოჩნდა ჯერ კიდევ 1992 წელს და მას შემდეგ მილიონობით ადამიანს დაეხმარა მსოფლიოს სხვადასხვა ენის შესწავლაში.
- Immersive method: ამ აპლიკაციას გამოარჩევს ის ფაქტი, რომ ინგლისურ ენას მომხმარებელი სწავლობს ინგლისურად და არა მშობლიურ ენაზე. ხსენებული მეთოდი მოსწავლეს უბიძგებს იფიქროს და იაზროვნოს სამიზნე ენაზე თარგმანის გარეშე.
- პირადი "მეტყველების მწვრთნელი": ეს არის ერთგვარი ვირტუალური მასწავლებელი, რომელიც მოგისმენს და შეგისწორებს გამოთქმას. Rosetta Stone-ის TruAccent ტექნოლოგია სწორედ ამას აკეთებს, უზრუნველყოფს, რომ ისე საუბრობდე, როგორც native speaker.
- ოფლაინ რეჟიმის წყალობით, შეგიძლია ჩამოტვირთო გაკვეთილები და ისწავლო ნებისმიერ დროს, ნებისმიერ ადგილას - ინტერნეტის გარეშე.
- Rosetta Stone არაა იაფი სიამოვნება. თუ შენი ბიუჯეტი შეზღუდულია, შეიძლება ეს არ იყოს იდეალური არჩევანი. 3 თვიანი მემბერშიფი მთლიანობაში $47.87 ღირს.
- ზოგიერთ მომხმარებელს Rosetta Stone-ის განმეორებადი სავარჯიშოები ცოტათი მოსაბეზრებლად მიაჩნია. ვისაც მრავალფეროვნება უყვარს, შეიძლება ეს პროგრამა ცოტა ერთფეროვანი მოეჩვენოს.
- მიუხედავად იმისა, რომ Rosetta Stone შესანიშნავია ბუნებრივი მეტყველების განვითარებისთვის, ის არ გთავაზობს გრამატიკის დეტალურად ახსნას.
მიუხედავად მცირე ნაკლოვანებებისა, Rosetta Stone მაინც რჩება ენის შესწავლის ერთ-ერთ უმნიშვნელოვანეს პლატფორმად როგორც დამწყებთათვის, ისე მაღალ დონეზე მყოფი მოსწავლეებისთვის. ის გამოირჩევა თავისი უნიკალური იმერსიული სწავლების მეთოდით, რომელიც ენას ასწავლის მშობლიური ენის გამოყენების გარეშე. მისი ინოვაციური მიდგომა, ტექნოლოგიური დახვეწილობა და ენობრივი მრავალფეროვნება მას გამორჩეულს ხდის სხვებისგან.
რეკომენდებულია შემდეგი დონეებისთვის: A2, B1, B1+, B2
5. ELSA Speak
ELSA Speak ინოვაციური, ხელოვნური ინტელექტით მართული აპლიკაციაა, რომელიც შექმნილია მეცნიერებისა და ლინგვისტების მიერ. მისი მთავარი მიზანია დაგეხმაროს ამერიკული ინგლისურის გამოთქმის დახვეწაში ინტერაქციული სავარჯიშოებისა და რეალურ დროში უკუკავშირის მეშვეობით.
განსხვავებით სხვა ენის შემსწავლელი აპლიკაციებისგან, ELSA Speak მთლიანად ფოკუსირებულია მხოლოდ გამოთქმის გაუმჯობესებაზე. აპი იყენებს ხმის ამოცნობის ტექნოლოგიას, რათა გაანალიზოს გამოთქმა და მოგაწოდოს პერსონალიზებული რჩევები.
ELSA Speak აპლიკაციას აქვს როგორც ძლიერი, ისე სუსტი მხარეები. მოდი, უფრო დეტალურად განვიხილოთ თითოეული მათგანი.
- ELSA Speak გამორჩეულია იმით, რომ ინგლისურის გამოთქმაზეა ფოკუსირებული.
- აპლიკაცია გთავაზობს პერსონალიზებულ უკუკავშირს, რაც გეხმარება შენი სუსტი მხარეების გამოვლენასა და გაუმჯობესებაში.
- აპლიკაცია იყენებს ხელოვნურ ინტელექტს გამოთქმის ანალიზისა და რეკომენდაციებისთვის.
- აპლიკაცია გთავაზობს მრავალფეროვან სავარჯიშოებსა და რეალური ცხოვრების სცენარებს, რაც გამოთქმის პრაქტიკას უფრო საინტერესოს ხდის.
- ELSA Speak-ის ყველა ფუნქციის სრულად გამოსაყენებლად საჭიროა ფასიანი გამოწერა. ყველაზე ხელმისაწვდომი პაკეტი 3 თვე გრძელდება და $19.99 ღირს.
- ზოგიერთი მომხმარებელი აღნიშნავს, რომ დროდადრო ტექნიკური პრობლემები ექმნებათ აპლიკაციის ხმის ამოცნობის ფუნქციასთან დაკავშირებით, რაც გარკვეულწილად ამცირებს ELSA Speak-ის ეფექტურობას.
- აპი მხოლოდ გამოთქმაზეა ორიენტირებული და ენის სხვა კომპონენტებს არ ავითარებს.
Elsa Speak იდეალურია ნებისმიერი ადამიანისთვის, რომელსაც სურს ინგლისური გამოთქმის დახვეწა. აპლიკაციის მახვილგონივრული და ზოგჯერ პირდაპირ გულწრფელი უკუკავშირი (დიახ, გეტყვის, თუ რობოტივით ჟღერ) სწავლას ინფორმატიულს და გასართობს ხდის. თუმცა, მზად იყავი, ჩადო ინვესტიცია აპლიკაციაში, თუ გსურს მაქსიმალური სარგებელი მიიღო მისგან.
რეკომენდებულია შემდეგი დონეებისთვის: B1, B1+, B2, C1
6. Promova
Promova ინოვაციური აპლიკაციაა, რომელიც ინგლისურის შესწავლას სრულიად ახალ დონეზე აიყვანს. წარმოიდგინე, შენი ძალისხმევა და მიზნები ერწყმის აპლიკაციის ჭკვიან ალგორითმს და შედეგად იღებ 100% პერსონალიზებულ სასწავლო გეგმას, რომელიც ზუსტად შენზეა მორგებული.
- Promova-ს ექსპრეს გაკვეთილები იდეალურია, რომ დატვირთულ გრაფიკშიც კი გამონახო დრო მათ შესასრულებლად.
- აპლიკაცია განსაკუთრებით ეფექტურია ლექსიკური მარაგის სწრაფად გასამდიდრებლად.
- Promova გამოირჩევა თანამედროვე მიმზიდველი ინტერფეისით.
- Promova-ს ჭკვიანი ალგორითმი შექმნის ინდივიდუალურ სასწავლო გეგმას შენი მიზნების, ამჟამინდელი დონისა და დროის გათვალისწინებით, რაც დაგეხმარება სასურველი შედეგის მიღწევაში.
- Promova-ს ოფლაინ რეჟიმის წყალობით, ინტერნეტის არარსებობა ვერ შეგიშლის ხელს, განაგრძო ინგლისურის შესწავლა ნებისმიერ ადგილას და ნებისმიერ დროს.
რა შეიძლება არ მოგეწონოს
- თუ ძირითადად გრამატიკის სიღრმისეულ შესწავლაზე ხარ ფოკუსირებული, მაშინ ეს აპლიკაცია შეიძლება არ აღმოჩნდეს ის, რასაც ეძებ.
- Promova-ში ვერ იპოვი მეტყველების პრაქტიკულ სავარჯიშოებს. თუ შენი მიზანი ინგლისურის თავისუფლად საუბარია, მოგიწევს სხვა რესურსების მოძებნა.
- თუ უფასო ვერსიას იყენებ, ძალიან ბევრ რეკლამასთან მოგიწევს გამკლავება.
- პრემიუმ ვერსიის გამოწერა საკმაოდ ძვირია სხვა მსგავს აპლიკაციებთან შედარებით. Promova-ს 1 თვიანი გამოწერა 14 ევრო დაგიჯდება (აპლიკაცია უკრაინელებისთვის უფასოა).
თუ შენი მიზანია, სწრაფად გაიმდიდრო ლექსიკა ვიზუალურად მიმზიდველ გარემოში, Promova შესანიშნავი არჩევანი იქნება. თუმცა, გრამატიკისა და ზეპირი პრაქტიკის სიმწირის გამო ის შეიძლება არ იყოს იდეალური არჩევანი ენის სრულყოფილად დაუფლების მსურველთათვის.
რეკომენდებულია შემდეგი დონეებისთვის: A2, B1, B1+, B2, C1
7. Memrise
Memrise პოპულარული ენის შემსწავლელი აპლიკაციაა, რომელიც იყენებს მნემონიკური ტექნიკებისა და პერიოდული გამეორების ალგორითმის კომბინაციას, რათა დაეხმაროს მომხმარებლებს ახალი ლექსიკისა და ფრაზების სწავლასა და დამახსოვრებაში.
- Memrise გამოირჩევა თამაშის ელემენტებისა და მნემონიკების გამოყენებით. აპლიკაცია მოიცავს ისეთ სახალისო ელემენტებს, როგორიცაა ქულები, ლიდერბორდები და ვიდეოები, რაც სწავლის პროცესს საინტერესოსა და ინტერაქციულს ხდის.
- Memrise იყენებს პერიოდული გამეორების ალგორითმს (spaced repetition algorithm), რომელიც უზრუნველყოს, რომ მომხმარებლებმა გაიმეორონ ლექსიკა საჭირო ინტერვალებით.
- აპლიკაცია მოიცავს ვიდეო კლიპებს, სადაც native speaker-ები საუბრობენ რელურ ყოველდღიურ სიტუაციებში, რაც მოსწავლეებს აძლევს საშუალებას, მოისმინონ ბუნებრივი გამოთქმა და ინტონაცია.
- ოფლაინ რეჟიმის წყალობით შეგიძლია ჩამოტვირთო გაკვეთილები და ნებისმიერ დროს დაიწყო სწავლა.
- Memrise დიდ ყურადღებას აქცევს ლექსიკის შევსებას, თუმცა გრამატიკის შესწავლაზე ნაკლებადაა ორიენტირებული.
- დროთა განმავლობაში შეიძლება მოგეჩვენოს რომ მასალა მეორდება.
- მიუხედავად იმისა, რომ კურსების მრავალფეროვნება აპლიკაციის ძლიერი მხარეა, მომხმარებლების მიერ შექმნილი კურსების ხარისხი ზოგჯერ საგრძნობლად განსხვავდება. ზოგიერთი კურსი შეიძლება არ იყოს ისეთი კარგად სტრუქტურირებული ან ზუსტი, როგორც ენის ექსპერტების მიერ შექმნილი.
- მართალია, Memrise გთავაზობს უფასო ვერსიას, თუმცა ყველა ფუნქციასა და კონტენტზე წვდომა გამოწერას მოითხოვს.
- ალიკაცია არაა ხელმისაწვდომი Play Store-ში საქართველოში, ამიტომ Android-ის მომხმარებლებს მოგიწევთ წვალება apk ფაილით დაყენებაზე.
Memrise იდეალური ინსტრუმენტია ლექსიკის გასამდიდრებლად, მაგრამ ენის სრულყოფილი ათვისებისთვის საჭიროებს სხვა რესურსებთან კომბინირებას. რეალური ცხოვრების ვიდეოებისა და პერიოდული გამეორების ალგორითმის გამოყენება მას ფასეულ რესურსად აქცევს შემსწავლელთათვის, მიუხედავად მისი შეზღუდვებისა გრამატიკისა და ენის სისტემური შესწავლის მხრივ.
რეკომენდებულია შემდეგი დონეებისთვის: A1, A2, B1, B1+
ბონუს აპლიკაცია: Lingwing
და ბოლოს, ბონუსად წარმოგიდგენთ უცხო ენების შემსწავლელ ქართულ აპლიკაციას Lingwing. პლატფორმამ მოღვაწეობა რამდენიმე წლის წინ დაიწყო და დღესდღეობით დაახლოებით 300 000-მდე მომხმარებელი ჰყავს. პლატფორმაზე 7 ენის სწავლა შეგიძლია და მათ შორისაა ქართული და ინგლისური.
Lingwing-ის მთავარი უპირატესობა ისაა, რომ უცხო ენის ნულიდან სწავლა შეგიძლია ქართულად დაიწყო. პლატფორმა საკმაოდ მოსახერხებელია და მარტივია ნავიგაცია.
- უცხო ენის სწავლა ქართულად შეგიძლია.
- ქართულის სწავლის მსურველს შეუძლია ინგლისურად ან სხვა ენაზე ისწავლოს ქართული.
- სასწავლო პროგრამა მოიცავს წერის, სამეტყველო, ლექსიკურ და სმენით კომპონენტებს.
- პრემიუმ პაკეტის მომხმარებელს კურსის დასრულების შემდგომ ონლაინ სერტიფიკატი გადაეცემა.
- პლატფორმას მხოლოდ დამწყები დონეები აქვს.
- სრული ფუნქციებით სარგებლობისთვის ფასიან ვერსიაზე გადასვლა მოგიწევს. 6-თვიანი გამოწერის შემთხვევაში თვე 28.90₾ დაგიჯდება.
Lingwing იდეალურია ქართველი მომხმარებლისათვის, რომელსაც სურს, რომ უცხო ენის სწავლა მშობლიურ ენაზე დაიწყოს. როგორც აღვნიშნეთ, პლატფორმაზე მხოლოდ დამწყები დონეები დაგხვდება, მაგრამ ამ დონეების გადალახვის შემდეგ შეგიძლია სხვა, რომელიმე ჩამოთვლილ აპლიკაციებზე გადახვიდე და კიდევ უფრო გაიღრმავო ინგლისურის ცოდნა.
რეკომენდებულია შემდეგი დონეებისთვის: A1, A2, B1
