თუ ინგლისურს სწავლობ, ალბათ შენთვისაც ნაცნობია ეს მომენტი: კითხულობ, უსმენ, თითქოს ყველაფერი გესმის (ნუ, ნაწილი მაინც), მაგრამ როცა საქმე ლაპარაკზე მიდგება, საჭირო სიტყვებს ვერასდროს პოულობ. ან კიდევ, სწავლობ ახალ სიტყვებს, მაგრამ რამდენიმე დღეში უკვე აღარ გახსოვს. მარტო არ ხარ! ეს ბევრისთვის ნაცნობი პრობლემაა, მაგრამ კარგი ამბავი ისაა, რომ გამოსავალი არსებობს.
ამ ბლოგში გაგიზიარებთ ყველაზე ეფექტურ თანამედროვე მეთოდებს, რომლებიც დაგეხმარება ინგლისური სიტყვების ადვილად დამახსოვრებაში და ასევე გაგაცნობთ მობილურ აპლიკაციებს, რომლების გარეშეც ცხოვრების გაგრძელება გაგიჭირდება. დავიწყოთ!
რას ნახავ ამ ბლოგში
მეხსიერების ბარათები (Flashcards): ძველი, მაგრამ ოქრო მეთოდი!
სიტყვების დამახსოვრების ეს კლასიკური ფორმა დღესაც ძალიან ეფექტურია. ამ მეთოდს ზუსტად შეესაბამება ინგლისური გამოთქმა “old but gold”. შეგიძლია გამოიყენო როგორც ჩვეულებრივი, ფურცლის ბარათები, ისე ციფრული ვერსიები აპლიკაციებში.
თუ სიტყვების ხელით ამოწერა გიყვარს და ეს გეხმარება დამახსოვრებაში, vocabulary ბლოკნოტი შეგიძლია მთლიანად ჩაანაცვლო ბარათების დასტებით. ეს ბლოკნოტთან შედარებით უფრო ეფექტურია, რადგან გაძლევს სიტყვების დახარისხების საშუალებას, დამახსოვრებული სიტყვები გადაგაქვს ცალკე დასტაში, ის სიტყვები კი რომლებსაც ჯერ კიდევ სწავლობ, ცალკე დასტაში გაქვს. ასევე შეგიძლია თემატური დასტები გააკეთო.
თუ უკვე სრულიად გაელექტრონულებული ადამიანი ხარ და კალამი ხელში დიდი ხანია არ გჭერია, მაშინ ბარათების აპლიკაციები შენთვისაა შექმნილი. არსებობს აპები, სადაც მზა დასტებია შენთვის შექმნილი და არსებობს ისეთებიც, სადაც შენს გემოზე ქმნი დასტებს. საუკეთესო მობილურ აპლიკაციებზე ცოტა ქვემოთ ნახავ რჩევებს.
- როგორ გამოვიყენოთ? ბარათის ერთ მხარეს დაწერე ინგლისური სიტყვა, მეორეზე – თარგმანი ან განმარტება. ბარათებს პერიოდულად ატრიალებ და ცდილობ გამოიცნო, რა წერია მეორე მხარეს.
- სად შევიძინოთ? ბარათები შეგიძლია შენით გამოჭრა ფურცლებიდან ან საკანცელარიო მაღაზიაში იყიდო პატარა ფურცლები. სპეციალური ფერადი ბარათების გამოწერა ასევე შეგიძლია Amazon-იდან ან Temu-დან (დაძებნე “flashcards”).
- რჩევა: არ შემოიფარგლო მხოლოდ სიტყვა-თარგმანით. წინადადებაში გამოყენება გაცილებით ეფექტურია! შეგიძლია დაამატო მაგალითი წინადადება, სინონიმები, ან თუნდაც პატარა ნახატი ასოციაციისთვის.
ინტერვალური გამეორების სისტემა (SRS): ტვინის საუკეთესო მეგობარი
რატომ გვავიწყდება ახალნასწავლი სიტყვები მალევე და რატომ ვტრიალებთ სულ ერთ წრე ენის სწავლის დროს? ისწავლი, დაგავიწყდება, მერე თავიდან ისწავლი, მერე ისევ დაგავიწყდება და ასე.
შენ არანაირად არ ხარ გამონაკლისი, ყველა ასე ვართ. ეს საკითხი ჯერ კიდევ 1885 წელს შეისწავლა გერმანელმა ფსიქოლოგმა ჰერმან ებინგჰაუსმა. მან აღმოაჩინა ის, რასაც დღეს “ებინგჰაუსის მრუდს” ანუ “დავიწყებადობის მრუდს” ვუწოდებთ. ამ მრუდის მიხედვით, ახალნასწავლი ინფორმაციის დაახლოებით 50% გვავიწყდება 1 დღეში, 1 კვირაში კი ნასწავლის 90% აღარ გვახსოვს.
საშინელებაა! წარმოიდგინე, რამდენი დრო დახარჯე 100 სიტყვის სასწავლად და ერთი კვირის შემდეგ მხოლოდ 10 სიტყვა გახსოვს!
რატომ ხდება ასე? ჩვენი ტვინი ენერგიის დაზოგვას ცდილობს. თუ ხედავს, რომ ინფორმაციას არ ვიყენებთ, ფიქრობს: “ჰმ, ეს არავის სჭირდება, მოდი, წავშლი!” და ბუმ! წაიშალა.
მაგრამ გამოსავალი არსებობს! დავიწყების მრუდს ვებრძვით ყველაზე ეფექტური იარაღით – პერიოდული, ჭკვიანურად დაგეგმილი გამეორებით. სწორედ ამას ეფუძნება ინტერვალური გამეორების სისტემა (Spaced Repetition System – SRS).
- როგორ მუშაობს SRS? როცა სიტყვას იმეორებ, ტვინი იღებს სიგნალს: “ოპა, ეს უკვე მეორედ შემხვდა, ალბათ მნიშვნელოვანია!” ყოველი ასეთი გამეორება “დავიწყების მრუდს” უფრო და უფრო ნაკლებად ციცაბოს ხდის – ანუ, სიტყვა უფრო ნელა გავიწყდება. რამდენიმე, სწორ ინტერვალებში გამეორების შემდეგ, ტვინი საბოლოოდ იაზრებს, რომ ეს ინფორმაცია ნამდვილად საჭიროა და მას გრძელვადიან მეხსიერებაში ინახავს. ასე სიტყვა უკვე მყარად ჯდება გონებაში და აღარ გავიწყდება.
- როგორ გამოვიყენოთ SRS? ეს ჭკვიანი ალგორითმი ჩაშენებულია რამდენიმე მობილურ აპლიკაციაში, რომელსაც ქვემოთ განვიხილავთ.
ისწავლე კონტექსტში: სიტყვები წინადადებებში ცოცხლდებიან!
ერთია სიტყვების ცალ-ცალკე დაზეპირება, მაგრამ მეორეა მათი სწორად გამოყენება. ხშირად სიტყვის მნიშვნელობა იცვლება იმის მიხედვით, თუ რა კონტექსტში გამოიყენება.
ავიღოთ, მაგალითად, ზმნა “catch”. შეიძლება იცოდე, რომ ნიშნავს “დაჭერას”. მაგრამ ინგლისურში ძალიან ხშირად გამოიყენება ტრანსპორტთან დაკავშირებით: “I catch the bus at 7:30” (ავტობუსს ვიჭერ 7:30-ზე – ქართულად ასე არ ვამბობთ, მაგრამ ინგლისურად ეს სტანდარტული ფრაზაა). მხოლოდ “დაჭერის” მნიშვნელობა რომ იცოდე, ეს წინადადება უცნაურად მოგეჩვენებოდა.
- “Sentence Mining” (წინადადებების მოპოვება): ეცადე, დაიმახსოვრო არა ცალკეული სიტყვები, არამედ მთლიანი წინადადებები, სადაც ეს სიტყვები გამოიყენება. ასე ერთდროულად სწავლობ სიტყვას, მის გრამატიკულ ფორმას და გამოყენების ტიპურ შემთხვევებს. ეძებე მაგალითები წიგნებში, სტატიებში, ფილმებში ან სთხოვე მასწავლებელს შენთვის რელევანტური წინადადებების შედგენა.
- ლექსიკონები: ინგლისური ენის კარგ ლექსიკონებში სიტყვის თითოეულ მნიშვნელობას ახლავს რამდენიმე მაგალითი, რომლებშიც ბოლდით ნაჩვენებია საკვანძო ფრაზები, რომლებშიც ეს სიტყვები ხშირად გამოიყენება.
მნემონიკა: გახადე დამახსოვრება სახალისო!
მნემონიკა არის ასოციაციების შექმნის ხელოვნება. ახალ, უცხო სიტყვას აკავშირებ რაიმე ნაცნობთან, სასაცილოსთან, უცნაურთან ან ადვილად წარმოსადგენთან.
- როგორ გამოვიყენოთ მნემონიკა? მაგალითად, სიტყვა "huge" (უზარმაზარი). შეიძლება წარმოიდგინო, რომ რაღაც ისეთი დიდია, რომ "ჰუუუ!"-ს იძახი გაოცებისგან. ან სიტყვა "look" (ყურება), შეიძლება დააკავშირო ქართულ "ლუკმასთან" და წარმოიდგინო, როგორ უყურებ გემრიელ ლუკმას.
- რჩევა: რაც უფრო კრეატიული, სასაცილო ან თუნდაც აბსურდული იქნება ასოციაცია, მით უფრო ადვილად დაგამახსოვრდება!
დაიწყე ფიქრი ინგლისურად: გამოიყენე ინგლისურ-ინგლისური ლექსიკონები
როგორ უნდა მიეჩვიო იმას, რომ ერთ ენაზე იფიქრო და მუდმივად არ თარმნიდე სიტყვებს გონებაში? ეს თავისით არ ხდება, ამაში გონება უნდა ვავარჯიშოთ, უნდა გავაბათ ძაფები, რომლებიც ცნებებს აკავშირებს პირდაპირ ინგლისურ სიტყვებთან, ქართულის გავლის გარეშე.
წარმოიდგინე, რომ ხედავ რომ ვიღაცა არის გაბრაზებული. როცა ქართულად აზროვნებ, შენს თავში ჯერ მოდის სიტყვა “გაბრაზებული” და შემდეგ თარგმნი ინგლისურად – “angry”, მაგრამ ყველას გვინდა, რომ გაბრაზებულ ადამიანს რომ დავინახავთ, პირდაპირ გაგვახსენდეს სიტყვა “angry”, ხო?
ამისთვის ყველაზე ეფექტური საშუალება არის ინგლისური სიტყვების სწავლა ინგლისური განმარტებებით, ქართული თარგმანის გარეშე. რაღაცნაირად უნდა ამოვაგდოთ ქართული როგორც შუალედური მედიატორი ცნებასა და ინგლისურ სიტყვას შორის. მოკლედ, თავიდან სიტყვებს სწავლობ ინგლისური განმარტებებით, მერე ეჩვევი იმას, რომ შენ თვითონ შეძლო სიტყვის განმარტება ინგლისურად. ასე ნელ-ნელა ტვინი გადადის ინგლისურენოვან რეჟიმზე და როცა ამ რეჟიმზე გადაერთვება, ქართული საერთოდ აღარ სჭირდება.
შეიძლება თავიდან რთული ჩანდეს, მაგრამ გვენდე, კენწეროში გატკბილდების.
- რომელი ლექსიკონები გამოვიყენოთ? ბევრი კარგი ონლაინ ლექსიკონი არსებობს, რომლებიც სპეციალურად ენის შემსწავლელებისთვისაა შექმნილი (სიტყვები განმარტებულია მარტივი ენით) და სრულიად უფასოა. მაგალითად, Oxford Learner's Dictionary, Cambridge Dictionary, Merriam-Webster Dictionary.
- რომელი ლექსიკონები არ გამოვიყენოთ? არ გამოიყენო გუგლის საძიებო სისტემაში ინტეგრირებული ლექსიკონი (დაგუგვლისას რომ გაჩვენებს ზოგჯერ განმარტებას ძიების შედეგებამდე). ეს არის ოქსფორდის განმარტებითი ლექსიკონი, რომელიც native speaker-ებისთვისაა და არა ინგლისურის შემსწაველებისთვის. ასევე შეძლებისდაგვარად მოერიდე ინგლისურ-ქართულ ლექსიკონებს და საერთოდ დაივიწყე google translate-ის არსებობა!
Use it or lose it: გამოიყენე ახალი სიტყვები პრაქტიკაში, თორემ დაგავიწყდება
ინგლისურში არის ასეთი გამოთქმა: “გამოიყენე, თორემ დაკარგავ”. ეს ეხება ყველაფერს, რაც რეგულარული გამოყენების გარეშე სუსტდება – ფიზიკური ფორმა, მანქანის ძრავი… და განსაკუთრებით – ახალი ლექსიკა! ყველას გვქონია შემთხვევა, როცა ნასწავლი სიტყვა დაგვვიწყებია, უბრალოდ იმიტომ, რომ არ გამოგვიყენებია.
- როგორ მოვიქცეთ? როგორც კი ახალ სიტყვას ან ფრაზას ისწავლი, ეცადე, პრაქტიკაში გამოიყენო რაც შეიძლება მალე, რომ მეხსიერებაში “ჩაგიჯდეს”. იდეალურ შემთხვევაში, ეს ნიშნავს მის გამოყენებას რეალურ საუბარში. თუ საუბრის საშუალება არ გაქვს, ისიც კი ეფექტურია, რომ ახალნასწავლი სიტყვები ხმამაღლა წარმოთქვა ხშირად, თუნდაც საკუთარ თავთან.
- როგორ ვიპოვოთ საუბრის პარტნიორები? სასაუბრო კურსები ძალიან ეფექტურია ინგლისური სიტყვების პრაქტიკაში გამოსაყენებლად (ქვემოთ ნახავ ინფორმაციას “ბექას სკოლის” სასაუბრო კურსის შესახებ). თუ ამის საშუალება არ გაქვს, შეიძლება სცადო პლატფორმები სადაც პოულობ ადამიანებს მთელი მსოფლიოდან, რომლებსაც შეგიძლია ესაუბრო ინგლისურად. ასეთებია, მაგალითად HelloTalk და Tandem.
ლექსიკის მწვრთნელები შენს ჯიბეში: საუკეთესო აპლიკაციები სიტყვების დასამახსოვრებლად
საბედნიეროდ, აღარ გვიწევს ბარათების ხელით ჭრა ან გამეორების გრაფიკის თავად შედგენა (თუმცა ესეც შესაძლებელია!). თანამედროვე აპლიკაციები გვეხმარებიან ბარათების მეთოდის, ინტერვალური გამეორების (SRS) და სხვა ტექნიკების მარტივად და ეფექტურად გამოყენებაში. მოდი, ვნახოთ რამდენიმე პოპულარული და საინტერესო ვარიანტი:
1. Cambridge Dictionary +Plus
ეს არის კემბრიჯის ცნობილი ლექსიკონის გაფართოებული ვერსია (აპლიკაცია/ვებგვერდი), რომელიც ლექსიკონის ფუნქციებს სწავლის ინსტრუმენტებს უმატებს.
უპირატესობები:
- სანდოობა: ეფუძნება კემბრიჯის უმაღლესი ხარისხის ლექსიკონს, განმარტებებს და მაგალითებს.
- ინტეგრაცია: შეგიძლია პირდაპირ ლექსიკონიდან შექმნა შენი სიტყვების სიები (Word Lists) და შემდეგ გამოიყენო ისინი ბარათებად ან ქვიზებად.
- სიტყვები კონტექსტში: სიტყვებს სწავლობ სანდო განმარტებებთან და რეალურ მაგალითებთან ერთად.
ნაკლოვანებები:
- Cambridge Dictionary +Plus უპირველესად ლექსიკონია და არა მხოლოდ დამახსოვრებაზე ორიენტირებული აპლიკაცია, როგორც სხვები.
- არ აქვს ინტერვალური გამეორების სისტემა (SRS) და ნაკლებად არის ფოკუსირებული მეხსიერების ტექნიკებზე სხვა სპეციალიზებულ აპებთან შედარებით
- ნაკლებად აქვს თამაშის და გართობის ელემენტები, როგორც სხვა აპლიკაციებს (Memrise, Quizlet, Knowt).
- უფასო ვერსიაში ცოტა რეკლამების ატანა მოგიწევს.
2. Anki
ძალიან ძლიერი, მოქნილი და პოპულარული ინტერვალური გამეორების (SRS) პროგრამა, რომელიც ღია კოდს ეფუძნება. ბარათების და SRS სისტემის მოყვარულებისთვის Anki უპირველესია.
უპირატესობები:
- ალგორითმის ეფექტურობა: ითვლება ერთ-ერთ ყველაზე ზუსტ და ეფექტურ SRS ალგორითმად გრძელვადიანი დამახსოვრებისთვის.
- მოქნილობა: შეგიძლია შექმნა ძალიან დეტალური ბარათები (ტექსტი, სურათი, აუდიო, ფორმულებიც კი) და დააკონფიგურო სწავლის პროცესი შენს სტილზე.
- უფასო (მეტწილად): კომპიუტერის ვერსია და Android აპლიკაცია (AnkiDroid) უფასოა. iOS ვერსია (AnkiMobile) ფასიანია. გაითვალისწინე, რომ ასევე არსებობს AnkiApp, AnkiPRO და კიდევ რამდენიმე “ქურდი” აპლიკაცია, რომლებიც Anki-ს სახელს იყენებენ, მაგრამ შესაძლებლობებით ახლოსაც ვერ მოვლენ მასთან. ამათ მოერიდე.
- Anki Community: ანკი ძალიან პოპულარულია, რაც ნიშნავს იმას, რომ ხელი მიგიწვდება მილიონობით მომხმარებლის მიერ შექმნილ ბარათების დასტებზე.
ნაკლოვანებები:
- ინტერფეისი და დაყენების პროცესი შეიძლება თავიდან ცოტა რთული და დამაბნეველი მოგეჩვენოს. თუ ახლა იწყებ ბარათების მეთოდის გამოყენებას, Anki შეიძლება არ იყოს საუკეთესო არჩევანი. პირიქით, შეიძლება შეგაძულოს ეს მეთოდი.
- აპლიკაციის დიზაინი საკმაოდ მარტივია, შეიძლება პრიმიტიულიც კი ვუწოდოთ (თუმცა შესაძლებელია მისი შეცვლა). თავიდან შეიძლება 90-იანი წლების საიტის ბეტა ვერსიად მოგეჩვენოს. თუ ესთეტი ხარ, Anki შეიძლება ნამდვილი ჯოჯოხეთი იყოს შენთვის.
- Anki-ს მომხმარებლებისთვის საჭიროა თვითდისციპლინა. სხვა აპლიკაციებისგან განსხვავებით, ის მოითხოვს შენგან ბარათების თავად შექმნას ან ხარისხიანი დასტების მოძიებას.
3. Memrise
Memrise არის ენების შესწავლის პოპულარული პლატფორმა, რომელიც იყენებს SRS სისტემას, ვიდეოებს და მნემონიკას.
უპირატესობები:
- გართობა და თამაში: სწავლის პროცესი ინტერაქტიული და სახალისოა, ბევრი ვიზუალური ელემენტით.
- მზა კურსები: აქვს მრავალფეროვანი მზა კურსების დიდი ბაზა სხვადასხვა ენასა და თემაზე.
- Native speaker ვიდეოები: ბევრ კურსში ნახავ მოკლე ვიდეოებს, სადაც ინგლისურენოვანი ადამიანები წარმოთქვამენ სიტყვებს/ფრაზებს.
- მნემონიკა: ხშირად იყენებს მზა ასოციაციებს სიტყვების დასამახსოვრებლად (შეგიძლია შენიც დაამატო).
ნაკლოვანებები:
- ზოგჯერ სავარჯიშოები შეიძლება ერთფეროვანი მოგეჩვენოს.
- Anki-სთან შედარებით ნაკლები თავისუფლება გაქვს ბარათების და სწავლის პროცესის მორგებაში.
- ფუნქციების დიდი ნაწილი ხელმისაწვდომია მხოლოდ ფასიან (Pro) ვერსიაში.
- საქართველოში ანდროიდის ვერსია არაა ხელმისაწვდომი, მაგრამ ანდროიდის ჭეშმარიტ მოყვარულებს გეცოდინებათ, მაინც როგორ დააყენოთ (IYKWIM).
4. Quizlet
Quizlet ძალიან პოპულარული და მარტივი აპლიკაცია ბარათების (flashcards) შესაქმნელად და სასწავლად, რომელიც მომხმარებლებს სთავაზობს სხვადასხვა სწავლის რეჟიმებს.
უპირატესობები:
- სიმარტივე: ძალიან მარტივია გამოსაყენებლად, საკუთარი ბარათების დასტების შექმნა წამებში შეგიძლია.
- მრავალფეროვანი რეჟიმები: გთავაზობს ბარათების კლასიკური გადაბრუნების გარდა, ტესტებს, მართლწერის სავარჯიშოებს და სახალისო თამაშებს (Match, Gravity).
- დიდი ბიბლიოთეკა: აქვს მომხმარებლების მიერ შექმნილი მილიონობით მზა სასწავლო ნაკრები თითქმის ნებისმიერ თემაზე.
- ხელმისაწვდომობა: საბაზისო ფუნქციები უფასოა და საკმაოდ ბევრის გაკეთების საშუალებას იძლევა.
ნაკლოვანებები:
- Quizlet-ის მთავარი ნაკლოვანება ისაა, რომ მას არ აქვს ინტერვალური გამეორების (SRS) ალგორითმი.
- რადგან ბარათების დასტები მომხმარებლების შექმნილია, ხარისხი შეიძლება ცვალებადი იყოს (შეცდომები, არასრული ინფორმაცია).
- უფასო ვერსიას აქვს რეკლამები და ფუნქციების დიდი ნაწილი (მაგ. სწავლების რეჟიმები, ოფლაინ სწავლა, პროგრესის დეტალური თრექინგი) მხოლოდ ფასიან ვერსიაშია (Quizlet Plus) ხელმისაწვდომი.
4. Knowt
შედარებით ახალი აპლიკაცია, რომელიც ხელოვნურ ინტელექტს (AI) იყენებს PDF ფაილებიდან, შენი ჩანაწერებიდან ან თუნდაც YouTube ვიდეოებიდან ელექტრონული ბარათების, ქვიზების და ნოუთების ავტომატურად შესაქმნელად. ასევე იყენებს SRS სისტემას.
უპირატესობები:
- AI და ავტომატიზაცია: ზოგავს დროს, რადგან ავტომატურად ქმნის სასწავლო მასალას შენივე ჩანაწერებიდან.
- ინტერვალური გამეორება: აპლიკაციაში ჩაშენებულია SRS ფუნქციონალი.
- თამაშის ელემენტები: სწავლის პროცესი ინტერაქციული და სახალისოა, აგროვებ ქულებს, მოიპოვებ badge-ებს და ა. შ.
- Quizlet-ის უფასო ალტერნატივა: უფასო ვერსიაში ხელმისაწვდომია სწავლის სხვადასხვა რეჟიმები (Learn Mode, Test Mode), რომლებიც შენი ბარათების დასტებიდან გიკეთებს მრავალფეროვან სავარჯიშოებს და ქვიზებს.
- მასკოტი: აპლიკაციას ყავს მასკოტი Kai, საყვარელი ფირუზისფერი დრაკონი, რომელიც გეხმარება, გახალისებს და თუ არ იმეცადინებ, გსაყვედურობს და დრამებსაც გიდგამს.
ნაკლოვანებები:
- რადგან შედარებით ახალია, ნაკლებია მომხმარებლის მიერ შექმნილი კონტენტი. თუმცა Quizlet-ის ბარათების დასტების შემოტანა წამებშია შესაძლებელი.
- AI-ს მიერ გენერირებული მასალის ხარისხი შეიძლება ყოველთვის იდეალური არ იყოს და საჭიროებდეს გადამოწმებას.
- აპლიკაციას აქა-იქ ბაგები აქვს, მაგრამ საკმაოდ სწრაფად ასწორებენ.
სიტყვებიდან თადვაჯერებულ საუბრამდე: სასაუბრო ინგლისურის ექსპრეს კურსი “ბექას სკოლაში”
თუ გრძნობ, რომ ინგლისური გარკვეულ დონეზე იცი, მაგრამ პრაქტიკის ნაკლებობის გამო საუბარი გიჭირს, საჭირო სიტყვებს ვერასდროს იხსენებ და გჭირდება გარემო, სადაც ნასწავლს აქტიურად გამოიყენებ, მაშინ შესაძლოა სპეციალიზებული სასაუბრო კურსი იყოს ის, რაც გჭირდება.
“ბექას სკოლის” სასაუბრო ინგლისურის ექსპრეს კურსი ორიენტირებულია სიტყვების მარაგის გამდიდრებაზე, პასიური ლექსიკის გააქტიურებაზე და საუბრის კომპლექსის მოხსნაზე.
- ვინ გასწავლის? გაკვეთილებს ატარებენ მხოლოდ native speaker მასწავლებლები (აშშ, ბრიტანეთი, სამხრეთ აფრიკა), რაც საუბრის კომპლექსების მოხსნას უწყობს ხელს.
- როგორ სწავლობ? მრავალფეროვანი თემატური გაკვეთილებით, დისკუსიებით, როლური თამაშებით და აქტივობებით, რომლებიც ფოკუსირებულია პრაქტიკულ, ყოველდღიურ ლექსიკაზე (2000+ სიტყვა, ფრაზა და იდიომა თითო დონეზე).
- ინგლისურენოვანი გარემო: სიტყვებს და ფრაზებს ვსწავლობთ ინგლისურად და საუბარიც გაკვეთილზე სრულად ინგლისურად მიმდინარეობს, რაც სტუდენტებს ეხმარება ერთ ენაზე ფიქრისა და აზროვნების უნარის განვითარებაში.
- ჭკვიანი დამახსოვრება: კურსი იყენებს თანამედროვე flashcard აპლიკაციას (Knowt) ინტერვალური გამეორების ალგორითმით (SRS). ეს გეხმარებათ გაკვეთილზე ნასწავლი სიტყვების და ფრაზების ეფექტურად და გრძელვადიანად დამახსოვრებაში.
მოკლედ, თუ სწორ მიდგომას აირჩევ და ამ მეთოდებიდან და აპლიკაციებიდან რომელიმეს მაინც დაამუღამებ, ინგლისური სიტყვების დამახსოვრება აღარ იქნება მოსაწყენი და რთული პროცესი! მთავარია, იპოვო შენთვის ყველაზე მოსახერხებელი მეთოდი და იყო თანმიმდევრული!
ყოველი ახალი სიტყვა წინ გადადგმული ნაბიჯია თავისუფალი და თავდაჯერებული საუბრისკენ. შენ ეს ნამდვილად შეგიძლია! წარმატებები!
